Хуулийн этгээдийн нэрийг өөрчилж, дүрмийг шинэчлэн батлах тухай

НИЙСЛЭЛИЙН

ИРГЭДИЙН ТӨЛӨӨЛӨГЧДИЙН ХУРЛЫН

ТОГТООЛ

2026 оны 06 сарын 17                                 Дугаар 26/58                     Улаанбаатар хот

Хуулийн этгээдийн нэрийг өөрчилж,

дүрмийг шинэчлэн батлах тухай

Монгол Улсын засаг захиргаа, нутаг дэвсгэрийн нэгж, түүний удирдлагын тухай хуулийн 35 дугаар зүйлийн 35.1.12 дахь заалт, 48 дугаар зүйлийн 48.1, 48.2 дэх хэсэг, Төрийн болон орон нутгийн өмчийн тухай хуулийн 77 дугаар зүйлийн 2 дахь хэсгийн 4 дэх заалт, Иргэний хуулийн 27 дугаар зүйлийн 27.1 дэх хэсгийг тус тус үндэслэн Нийслэлийн иргэдийн Төлөөлөгчдийн Хурлаас ТОГТООХ нь:

1.“Хүүхэд залуучуудын сургалт хүмүүжлийн тусгай цогцолбор ОНӨТҮГ”-ын нэрийг “Хүүхэд залуучуудын сургалт хөгжлийн цогцолбор” ОНӨТҮГ гэж өөрчлөн, дүрмийг хавсралтаар шинэчлэн баталсугай.

2.Хуулийн этгээдийг өөрчлөн байгуулсантай холбоотойгоор дараах арга хэмжээг авч хэрэгжүүлэхийг Нийслэлийн Засаг дарга бөгөөд Улаанбаатар хотын Захирагч (Б.Пүрэвдагва)-д даалгасугай.

2.1.Батлагдсан дүрмийг холбогдох хууль тогтоомжийн дагуу улсын бүртгэлд бүртгүүлэх;

2.2.Газрын бүтэц, орон тоог батлах, удирдлагыг томилох;

2.3.Үйл ажиллагааны зардлыг нийслэлийн төсвийн холбогдох зардлаас санхүүжүүлж, нэгдсэн удирдлагаар хангах.

          3.Тогтоолын хэрэгжилтэд хяналт тавьж ажиллахыг Хурлын Засаглал, эрх зүйн хороо (Б.Сэмжидмаа)-нд даалгасугай.

ДАРГА                                      Д.ИХБАЯР

          Нийслэлийн  иргэдийн  Төлөөлөгчдийн

Хурлын   2026   оны   06   дугаар  сарын

17-ны өдрийн .......... дугаар   тогтоолын          

 хавсралт

“ХҮҮХЭД ЗАЛУУЧУУДЫН СУРГАЛТ ХӨГЖЛИЙН ЦОГЦОЛБОР”

ОРОН НУТГИЙН ӨМЧИТ ТӨСӨВТ ҮЙЛДВЭРИЙН ГАЗРЫН

 ДҮРЭМ

НЭГ.НИЙТЛЭГ ҮНДЭСЛЭЛ

1.1.Энэ дүрмийн зорилго нь “Хүүхэд залуучуудын сургалт хөгжлийн цогцолбор” орон нутгийн өмчит төсөвт үйлдвэрийн газрын удирдлага, зохион байгуулалт, чиг үүргийг тогтоож, тэдгээртэй холбогдсон харилцааг зохицуулахад оршино.

1.2.Үйлдвэрийн газар нь үйл ажиллагаандаа Монгол Улсын Үндсэн хууль, Монгол Улсын засаг захиргаа, нутаг дэвсгэрийн нэгж, түүний удирдлагын тухай хууль, Төсвийн тухай хууль, Монгол Улсын нийслэл Улаанбаатар хотын эрх зүйн байдлын тухай хууль, Төрийн албаны тухай хууль, Хүүхдийн эрхийн тухай хууль, Хүүхэд хамгааллын тухай хууль, Залуучуудын хөгжлийг дэмжих тухай хууль, Төрийн албаны тухай хууль, Хөдөлмөрийн тухай хууль, Засгийн газар, Нийслэлийн иргэдийн Төлөөлөгчдийн Хурал, Нийслэлийн Засаг даргын шийдвэр болон энэхүү дүрмийг мөрдлөг болгож ажиллана.

1.3. Хүүхэд Залуучуудын сургалт хөгжлийн цогцолбор нь нийслэлийн хэмжээнд эцэг эхийн хараа хяналтаас гарч хүнд нөхцөлд амьдардаг бүтэн өнчин, эрх нь зөрчигдсөн 04-18 нас хүртэлх хүүхдүүдийг дүүргийн Засаг даргын захирамжаар хүлээн авч асрамж халамжийн үйлчилгээ үзүүлэхээс гадна нийслэлийн хэмжээний асрамж халамжийн төвүүдэд амьдарч байгаад 18 нас хүрсэн ч эцэг эх, харгалзан дэмжигчгүй, өөрийн орон гэргүй, төрөөс зайлшгүй анхаарал шаардлагатай 18-20 хүртэлх насны залуустай сайн дурын үндсэн дээр гэрээ байгуулан түр хугацаагаар байрлуулан ажилд зуучлах, сургалтад хамруулах, сэтгэл зүйн үйлчилгээ үзүүлэх, улмаар амьдралд бэлтгэх чиг үүрэг бүхий тусгай статустай асрамж халамжийн байгууллага мөн.

1.4. Үйлдвэрийн газрын оноосон нэр нь “Хүүхэд залуучуудын сургалт хөгжлийн цогцолбор” орон нутгийн өмчит төсөвт үйлдвэрийн газар (цаашид “Газар” гэх), товчилсон нэр нь “ХЗСХЦ” ОНӨТҮГ байна.

1.5 “Хүүхэд залуучуудын сургалт хөгжлийн цогцолбор” ОНӨТҮГ нь холбогдох журмын дагуу үйлдсэн тэмдэг, албан бичгийн хэвлэмэл хуудас хэрэглэх бөгөөд өөрийн бэлгэдэлтэй байна. Тэмдгийг газрын даргаас итгэмжлэн хариуцуулсан этгээд түшиж, ашиглалт, хамгаалалт, хадгалалтыг хариуцна.

1.6. Бэлгэдлийн загварыг даргын тушаалаар батлах бөгөөд оюуны өмчийн асуудал хариуцсан төрийн захиргааны байгууллагад бүртгүүлж, хэрэглэх “Хүүхэд залуучуудын сургалт хөгжлийн цогцолбор” ОНӨТҮГ эдэлнэ.

1.7. Газрын хаяг: Тухайн хуулийн этгээдийн байрлаж байгаа газрын хаягаар тодорхойлогдох бөгөөд хаягийн өөрчлөлтийг тухай бүр улсын бүртгэлд бүртгүүлнэ.

ХОЁР. ҮЙЛДВЭРИЙН ГАЗРЫН ҮНДСЭН ЧИГ ҮҮРЭГ,

ҮЙЛ АЖИЛЛАГААНЫ ЧИГЛЭЛ

2.1.Газрын үндсэн зорилго нь Хүүхэд, залуучуудын хөгжил, хамгааллыг хангах, нийгэм, сэтгэл зүйн үйлчилгээ үзүүлэх замаар тэдний хууль ёсны эрх, ашиг сонирхлыг хамгаалахад оршино.

2.2.Газар нь дараах чиг үүргийг хэрэгжүүлнэ:

2.2.1. Эцэг эхийн хараа хяналтаас гарсан, хүнд нөхцөлд амьдарч байгаа, бүтэн өнчин, гэр бүлийн орчинд амьдрах боломжгүй, эрх нь зөрчигдсөн, төрөөс зайлшгүй асрамж, халамж, хамгааллын үйлчилгээ авах шаардлагатай 04-18 насны хүүхдийг холбогдох хууль, журмын хүрээнд хүлээн авч, түр болон урт хугацааны асрамж, хамгаалал, нийгэм-сэтгэлзүйн үйлчилгээ үзүүлэх;

2.2.2.Эцэг эх, асран хамгаалагч, харгалзан дэмжигчгүй, өөрийн гэсэн орон байргүй, төрөөс зайлшгүй дэмжлэг, хамгаалалт шаардлагатай 18-20 хүртэлх насны залуучуудыг түр хугацаагаар гэрээ байгуулан нийгэмшүүлэх, бие даан амьдрах чадварт бэлтгэх үйлчилгээ үзүүлэх;

2.2.3.16 ба түүнээс дээш насны хүүхдүүдийг шаардлагатай тохиолдолд байгууллагын даргын зөвлөлийн хурлаар хэлэлцэн шийдвэрлэсний үндсэн дээр Залуучуудын төв рүү шилжүүлэн үйлчилгээ үзүүлэх;

2.2.4.Нийслэлийн хэмжээнд үйл ажиллагаа явуулж буй асрамж, халамжийн төвүүдэд амьдарч байгаад 18 нас хүрсэн залуучуудыг хүлээн авч үйлчилгээ үзүүлэх;

2.2.5.Хүүхэд, залуучуудын боловсрол, эрүүл мэнд, нийгэм, сэтгэлзүйн хөгжлийг дэмжих цогц үйлчилгээ үзүүлж, үйлчилгээний чанар, хүртээмжийг тасралтгүй сайжруулах, тэдний эрх, ашиг сонирхлыг хамгаалах арга хэмжээг авч хэрэгжүүлэх;

2.2.6.Хүүхэд, залуучуудын эрүүл мэндийг хамгаалах, урьдчилан сэргийлэх үзлэг, эмчилгээ, эрүүл ахуйн үйлчилгээг холбогдох байгууллагатай хамтран зохион байгуулах;

2.2.7.Хүүхэд асрах хувилбарт үйлчилгээг хэрэгжүүлэх;

2.2.8. Хүүхэд, залуучуудыг боловсролын үйлчилгээнд бүрэн хамруулах, сургууль завсардалтаас урьдчилан сэргийлэх, тасралтгүй суралцах орчин нөхцөлийг бүрдүүлэх чиглэлээр холбогдох байгууллагуудтай хамтран ажиллах;

2.2.9.Хүүхэд, залуучуудыг албан бус сургалт, хүүхэд хөгжүүлэх дугуйлан, секц, соёл урлаг, спорт болон нийгэмд чиглэсэн хөгжлийн үйл ажиллагаанд идэвхтэй, бүрэн хамруулах замаар авьяас чадвар, төлөвшлийг дэмжих;

2.2.10.Залуучуудад бие даан амьдрахад шаардлагатай мэдлэг, чадвар, дадал хэвшил эзэмшүүлэх, хөдөлмөр эрхлэлт, боловсрол, нийгмийн харилцаанд оролцоход бэлтгэх;

2.2.11.Залуучуудыг ажлын байранд зуучлах, хөдөлмөр эрхлэлтийг дэмжих, мэргэжил арга зүйн зөвлөгөө өгөх, ажил олгогч байгууллагуудтай хамтран ажиллах замаар тогтвортой хөдөлмөр эрхлэхэд дэмжлэг үзүүлэх;

2.2.12. Монгол Улсын Засгийн газар болон Нийслэлийн Засаг даргын бүрэн эрхийн хугацааны мөрийн хөтөлбөр, эдийн засаг, нийгмийн зорилтуудыг хэрэгжүүлэхэд үйл ажиллагаагаа чиглүүлнэ;

2.2.13.Нийслэлийн Засаг даргаас эрх шилжүүлсэн бусад чиг үүргийг хэрэгжүүлэх.

2.3.3.Цогцолборын багш, ажилтан, албан хаагчдад албан тушаалын зэрэглэлээс хамаарч Засгийн газраас тогтоосон төрийн албан хаагчийн албан тушаалын цалингийн сүлжээний дагуу цалин олгох ба Засгийн газрын 2012 оны 185 дугаар тогтоолоор батлагдсан “Тусгай сургалтын төрийн өмчийн байгууллагын зарим албан тушаалтанд нэмэгдэл хөлс олгох” журмын дагуу нэмэгдэл цалинг олгоно.

2.3.4.Газар нь эд хөрөнгийн талаар Төрийн болон орон нутгийн өмчийн тухай хуулийн 17 дугаар зүйлийн 1 дэх хэсэгт заасан эрх, үүргийг хэрэгжүүлнэ.

ГУРАВ.ГАЗРЫН БҮТЭЦ, ЗОХИОН БАЙГУУЛАЛТ

3.1.Газрын зохион байгуулалтын бүтэц, орон тооны хязгаарыг Нийслэлийн Засаг дарга батална.

3.2.Газрын бүтцийн нэгж үйл ажиллагааныхаа явц, үр дүнг газрын даргын өмнө хариуцан тайлагнана.

3.3.Газар нь хариуцсан чиг үүргийн хүрээнд гүйцэтгэлийн төлөвлөгөө боловсруулж ажиллах бөгөөд гүйцэтгэлийн төлөвлөгөөг Нийслэлийн Засаг дарга, чиг үүргийн удирдлагын саналыг тусган батлуулж, хэрэгжилтийг зохион байгуулан, хяналт тавьж ажиллана.

3.4.Газар нь Улсын Их Хурал, Засгийн газар, Ерөнхийлөгчийн Тамгын газар болон төрийн захиргааны төв байгууллагатай Нийслэлийн Засаг даргаар дамжуулан харилцана.

3.5.Газар нь хууль тогтоомж, Нийслэлийн иргэдийн Төлөөлөгчдийн Хурлын тогтоол, Засаг даргын захирамж, үүрэг, даалгавар, төсөл, хөтөлбөрийг хэрэгжүүлэх ажлыг зохион байгуулж, үйл ажиллагааны явц, гүйцэтгэлийн үр дүн, холбогдох тайлан мэдээллийг тогтоосон хугацаанд Нийслэлийн Засаг даргын Тамгын газарт тайлагнана.

ДӨРӨВ. ГАЗРЫН УДИРДЛАГА

4.1.Газрын даргыг Нийслэлийн Засаг дарга бөгөөд Улаанбаатар хотын Захирагч томилж, чөлөөлнө.

 4.2.Газрын дарга нь Төрийн болон орон нутгийн өмчийн тухай хуульд заасан шалгуурыг хангасан байх бөгөөд нийгэм, хүүхэд хамгаалал, хүүхэд хөгжлийн чиглэлээр боловсрол эзэмшсэн туршлагатай хүнийг томилно.

4.3.Дарга нь Төрийн болон орон нутгийн өмчийн тухай хууль болон холбогдох бусад хууль тогтоомж, энэхүү дүрэм, Нийслэлийн Засаг дарга бөгөөд Улаанбаатар хотын Захирагчтай байгуулсан гэрээнд заасан эрх хэмжээний хүрээнд үйлдвэрийн газрын өдөр тутмын үйл ажиллагааг удирдан зохион байгуулж, үр дүнг Нийслэлийн Засаг дарга бөгөөд Улаанбаатар хотын Захирагчийн өмнө хариуцна.

4.4.Газрын хариуцсан чиг үүрэгт хамаарах нийслэлийн хөгжлийн урт, дунд, богино хугацааны бодлогын баримт бичиг боловсруулах, батлуулах, салбар дундын уялдааг хангах, зохицуулах, хяналт тавих, захиргааны эрх хэмжээний асуудлаар зөвлөмж, чиглэл өгөх, мэргэжил, арга зүйн дэмжлэг, туслалцаа үзүүлэх, үйл ажиллагааны гүйцэтгэлд хяналт тавих чиг үүргийн удирдлагыг Нийслэлийн Засаг даргын Тамгын газар хэрэгжүүлнэ.

4.5.Газрын хариуцсан чиг үүргийн хүрээнд нийслэлийн хөгжлийн бодлогод нийцүүлэн гүйцэтгэлийн төлөвлөгөө боловсруулж, батлуулах, хэрэгжилтийг зохион байгуулах, хяналт тавих, чиг үүргийн удирдлагаас өгсөн зөвлөмж, чиглэлийн дагуу ажиллах, үйл явц, үр дүнг тогтоосон хугацаанд тайлагнах, газрыг нэгдсэн удирдлага, зохион байгуулалтаар хангах шугаман удирдлагыг газрын дарга хэрэгжүүлнэ.

 4.6.Дарга нь доор дурдсан бүрэн эрхтэй байна:

                     4.6.1.Хууль тогтоомжоор олгосон эрх хэмжээний хүрээнд тушаал гаргах, газрын хөдөлмөрийн дотоод журам, холбогдох дүрэм, журмыг баталж мөрдүүлэх;

                    4.6.2.Батлагдсан бүтэц, орон тооны хүрээнд хууль, журмын дагуу албан хаагчдыг томилох, чөлөөлөх, урамшуулах, сахилгын шийтгэл ногдуулах, албан тушаалын тодорхойлолтыг боловсруулж, батлуулах;

4.6.3.Дарга болон хэлтсийн дарга, албан хаагчидтай гүйцэтгэлийн төлөвлөгөө, төрийн үйлчилгээний албан хаагчидтай хөдөлмөрийн гэрээ байгуулж, хэрэгжилтэд хяналт тавьж ажиллах;

4.6.4.Сахилга, дэг журам, төрийн албан хаагчийн ёс зүйн хэм хэмжээг сахиулах, албан хаагчдын ажлын цаг ашиглалт, эд хөрөнгийн ашиглалт, зарцуулалт, хамгаалалтад хяналт тавьж, зөрчил, дутагдлыг арилгах, гэмт хэрэг, зөрчлөөс урьдчилан сэргийлэх ажлыг зохион байгуулах;

4.6.5.Албан хаагчдын нийгмийн асуудлыг хууль тогтоомж, хөдөлмөрийн дотоод журмын дагуу шийдвэрлэх, мэдлэг, ур чадварыг дээшлүүлэх, мэргэшүүлэх ажлыг зохион байгуулах;

4.6.6.Газрын үйл ажиллагааг хэвийн явуулах, ажлын байрны чиг үүргийн давхардал, хийдлийг арилгаж, уялдаа холбоог сайжруулах, боловсронгуй болгох арга хэмжээ авах;

4.6.7.Хариуцсан чиг үүрэгт хамаарах асуудлаар холбогдох хууль тогтоомж, дүрэм, журам, норм стандартад санал өгөх, дүрэм, журам, норм, үндэсний болон хотын стандартын төсөл боловсруулах, хүчин төгөлдөр  мөрдөгдөж буй хууль тогтоомж, дүрэм журам, норм стандартыг мөрдүүлэх;

4.6.8.Хариуцсан чиг үүрэгт хамаарах асуудлаар удирдах албан тушаалтанд хандаж санал гаргах, шийдвэрлүүлэх;

4.6.9.Хариуцсан чиг үүрэгт хамаарах асуудлаар удирдах албан тушаалтан, холбогдох байгууллага, албан хаагчдыг мэргэжил, арга зүйн зөвлөгөө, зөвлөмжөөр хангах;

4.6.10.Архив, албан хэрэг хөтлөлтийн үйл ажиллагааг боловсронгуй болгох арга хэмжээ авч хэрэгжүүлэх;

4.6.11.Багш, ажилтан, албан хаагчдыг хууль тогтоомж
зөрчсөн, гэмт хэрэг үйлдсэн, хүүхэд залуучуудтай зүй бусаар харьцсан, мэргэжлийн ёс зүйн ноцтой зөрчил гаргасан тохиолдолд зохих арга хэмжээг хуулийн хүрээнд авч ажиллах;

                    4.6.12.Газрын дарга дэргэдээ байгууллагын зорилт, чиг үүргийг хэрэгжүүлэхтэй холбогдсон асуудлаар түүнд зөвлөх, санал, дүгнэлт гаргах үүрэг бүхий Зөвлөл байгуулан ажиллуулж болно.

        4.6.13.Зөвлөлийн бүрэлдэхүүн, ажиллах журмыг газрын дарга батална.

4.6.14.хууль тогтоомжид заасан бусад бүрэн эрх;

ТАВ.САНХҮҮГИЙН ТАЙЛАН, ТЭНЦЭЛ, БҮРТГЭЛ

5.1. Газрын тухайн жилийн төсөв нь  дараах санхүүгийн эх үүсвэрээс бүрдэнэ:

5.1.1. Улс, нийслэлийн төсвийн санхүүжилт;

5.1.2. Хууль тогтоомж, энэ дүрмээр зөвшөөрөгдсөн бусад орлого;

5.2. Газрын санхүүгийн жил тухайн оны 12 дугаар сарын 31-ний өдөр дуусаж, дараа оны 1 сарын 1-ний өдөр эхэлнэ.

5.3. Газар нь Нягтлан бодох бүртгэлийн тухай хууль, холбогдох бусад хууль, тогтоомжийн дагуу жил бүр санхүүгийн тайлан гаргаж, аудитын дүгнэлт гаргуулна.

5.4. Газрын санхүүгийн тайлангийн үнэн зөвийг дарга, ерөнхий нягтлан бодогч хариуцна.

5.5. Газрын санхүүгийн тайланд дараах зүйлийг тусгана:

5.5.1.Баланс;

5.5.2.Орлого, үр дүнгийн тайлан;

5.5.3.Мөнгөн гүйлгээний тайлан;

5.5.4.Хуримтлагдсан ашгийн тайлан;

5.5.5. Тухайн тайлангийн хугацаанд хийсэн их хэмжээний болон сонирхлын зөрчил бүхий хэлцлийн жагсаалт, нэр, төрөл, үнийн дүн, удирдлагад олгосон цалин, шагнал, урамшуулал;

5.5.6. Байгууллага, иргэд, ажилтнаас авах авлага, тэдгээрийн үүссэн шалтгаан, барагдуулалтын явц;

5.5.7. Нэмэлт тайлбар;

5.5.8. Санхүүгийн тайлангийн тодруулга;

5.5.9. Бусад.

   5.6. Газрын санхүү, ерөнхий нягтлан бодогч хуулиар тогтоосон журмын дагуу анхан шатны болон нягтлан бодох бүртгэл хөтлөх, санхүүгийн тайлан гаргах ажлыг хариуцан зохион байгуулж, дүгнэлт гарган даргад танилцуулна. Дарга нь тухайн жилийн үйл ажиллагаа, хөрөнгө, санхүү, үр дүнгийн талаар тодорхой тусгасан дараах мэдээллийг агуулсан тайланг Нийслэлийн Засаг дарга бөгөөд Улаанбаатар хотын Захирагч, нийслэлийн өмчийн асуудал хариуцсан байгууллагад тус тус хүргүүлнэ:

5.6.1.Тайлангийн хугацаанд үйлдвэрийн газрын эрхлэн явуулсан үндсэн үйл ажиллагааны талаарх дэлгэрэнгүй танилцуулга, үйл ажиллагааны үр дүн;

5.6.2.Тайлангийн хугацаанд үйлдвэрийн газрын албан тушаалтан ажиллагсдад олгосон шагнал, урамшуулал, удирдлагын зардлын хэмжээ;

5.6.3.шаардлагатай бусад мэдээлэл.

   5.7.Газар нь төсвийн орлого, зарлагын мэдээ, мөнгөн болон мөнгөн бус хөрөнгийн гүйцэтгэлийн тайланг улирал, жил тутам гаргаж, хөндлөнгийн аудитын байгууллагаар баталгаажуулан нийслэлийн Засаг дарга бөгөөд Улаанбаатар хотын Захирагч, нийслэлийн өмчийн асуудал хариуцсан байгууллагад тус тус хүргүүлнэ.

5.8.Газар нь эд хөрөнгийн дотоодын тооллогыг хугацаанд нь явуулж, жилийн тайлан тэнцэлд тулгана.

5.9.Газар нь төсвийн тухай хуульд заасны дагуу өөрийн чиг үүрэг, зорилтыг хэрэгжүүлэхэд шаардлагатай хөрөнгө оруулалт, урсгал зардлын төлөвлөгөөг

ЗУРГАА.ХЯНАЛТ, ШАЛГАЛТ

6.1. Газрын эд хөрөнгийн хадгалалт, хамгаалалт, эзэмшилт, ашиглалт, захиран зарцуулалтад нийслэлийн өмчийн асуудал хариуцсан байгууллага холбогдох хууль тогтоомжийн дагуу хяналт тавьж ажиллана.

6.2. Газрын дарга нь байгууллагын өмч хөрөнгийн хадгалалт, хамгаалалтад өдөр тутам тавих дотоодын хяналтыг зохион байгуулж, түүний үр дүнг Нийслэлийн Засаг дарга бөгөөд Улаанбаатар хотын Захирагчийн өмнө хариуцна.

6.3. Газрын өмч хөрөнгийн хадгалалт, хамгаалалтад ерөнхий нягтлан бодогч бүртгэлийн хяналт тавина.

6.4. Газрын үйл ажиллагаанд  дотоод хяналт, шалгалтыг зохион байгуулах чиг үүрэг бүхий ажилтантай байна.

6.5. Дотоод хяналт, шалгалтыг зохион байгуулах чиг үүрэг бүхий ажилтны ажиллах журмыг “Аж ахуйн нэгж, байгууллагын үйл ажиллагаанд дотоод хяналт шалгалтыг зохион байгуулах нийтлэг журам” болон даргын тушаалаар баталсан журмаар зохицуулна.

ДОЛОО.ГАЗРЫН БАРИМТ БИЧГИЙГ ХАДГАЛАХ

7.1.Газар нь албан хэрэг хөтлөлт, хадгалалтын нийтлэг журмыг мөрдөн ажиллаж дараах баримт бичгийг хадгална:

7.1.1. Газрын дүрэм, дүрэмд орсон нэмэлт, өөрчлөлт, үйлдвэрийн газрыг байгуулах эрх бүхий байгууллагын шийдвэр, улсын бүртгэлийн гэрчилгээ, эрх, лиценз, тусгай зөвшөөрөл, сертификат;

7.1.2.Санхүүгийн болон үйл ажиллагааны тайлан, түүнд хийсэн аудитын дүгнэлт, зөвлөмж;

7.1.3.Анхан шатны болон нягтлан бодох бүртгэлийн баримт, нягтлан бодох бүртгэлд тусгасан эд хөрөнгө болон эд хөрөнгийн эрхийг нотлох бичиг баримт;

7.1.4.Үйлдвэрлэл, технологи, үйл ажиллагаатай холбогдсон дүрэм, журам, заавар стандарт, холбогдох бусад баримт бичиг;

7.1.5.Хурлын тэмдэглэл, шийдвэр, даргын гаргасан тушаал, шийдвэр;

7.1.6.Шаардлагатай бусад баримт бичиг.

НАЙМ.ХАРИУЦЛАГА

8.1. Албан ажилдаа хариуцлагагүй хандсаны улмаас бусдын хууль ёсны эрх ашгийг хохироосон, гүйцэтгэлийн төлөвлөгөө болон энэ дүрмээр хүлээсэн үүргээ хангалтгүй биелүүлсэн ажилтан, албан хаагчдад Төрийн албаны тухай хууль болон холбогдох бусад хуулийн дагуу хариуцлага хүлээлгэнэ.

ЕС.БУСАД

9.1. Энэ дүрэмд зааснаас бусад асуудлыг Төрийн болон орон нутгийн өмчийн тухай хууль, холбогдох бусад хууль тогтоомжоор зохицуулна.

9.2. Газрын энэхүү дүрэм нь Монгол улсын Улсын бүртгэлийн ерөнхий газрын хуулийн этгээдийн бүртгэлийн газарт бүртгэгдсэн өдрөөс эхлэн хүчин төгөлдөр үйлчилнэ.

--- о0о ---